Облыстық білім басқармасының басшысы Ақзира Қасымова коронавирусқа қарсы вакцина салдырды. Бұл туралы аймақтың бас педагогы өзінің Facebook әлеуметтік желісіндегі парақшасында хабардар етті. 

«Өңірде бүгінде вакцинаның екінші кезеңінде 1261 педагог екпе салдырды. Оның ішінде аудандық, қалалық білім бөлім басшылары, директорлар және педагогтар бар. Бұл орайда мен медицина мамандарына үлкен сенім артамын. Сондықтан бүгін өз денсаулығым үшін №3 қалалық емханада вакцина салдырдым. Дәрігерлер денсаулығымды бақылап, қан қысымымды өлшеп, дене қызуымды тексеріп барып, екпе салды.

Білім беру ұйымдарын аралап, педагогтармен қарым-қатынас орнатып, балалармен кездесетіндіктен вакцина салдыруды жөн санадым. Екпеден қорқудың қажеті жоқ деп санаймын. Өз денсаулығымыз үшін шешім қабылдап, вакцина салдыруға шақырамын», - делінген хабарламада.

Басқарма басшысының айтуынша, бізге балалардың амандығы, ұстаздардың саулығы, ата-аналардың сақтығы керек. Сол арқылы індеттен айналып өтіп, қалыпты тіршілікке оралуға әбден болады.