Колледж – Элизабет Тұрсынбаеваның жүлдесіне арналған республикалық жарыстың серіктесі

Текей батыр Қарпықұлы атындағы жоғары колледжінің демеушілік саясаты бағыттарының бірі – талантты жас спортшыларға қолдау көрсету. Сол қалыптасқан үрдістен қалмай бұл оқу орны алдағы уақытта өтетін Қазақстан Республикасының Тәуелсіздігінің 30-жылдығына арналған ҚР еңбек сіңірген спорт шебері Элизабет Тұрсынбаеваның жүлдесі үшін мәнерлеп сырғанаудан республикалық турнирдің демеушілері қатарына енді.

Жарыс осы жылдың 29 сәуір – 2 мамыр аралығында Қызылорданың «Мұз айдыны» спорт кешенінде өтеді. Оған Нұр-Сұлтан, Алматы, Шымкент қалалары және республиканың барлық облыстарынан 250-ге жуық жас спортшылар қатысады деп күтулуде. Әр бағдарламаның жүлдегерлері арнайы дипломдар, медальдар мен кубоктармен наградталады. Одан бөлек барлық қатысушыларға естелік сыйлықтар мен сертификаттар табыс етіледі.

Даңқты спортшы қызымыздың әкесі Байтақ Тұрсынбаевтың айтуынша, бастапқыда бұл жарысты халықаралық деңгейде ұйымдастыру ойда болған. Алайда, коронавирус пандемиясына байланысты кейінірек жарысты республикалық деңгейде өткізуге шешім қабылданыпты. Дегенмен, жарысты ұйымдастыру барысында санитарлық-эпидемиологиялық талаптардың орындалуы басты назарда болады.

- Еліміздегі эпидемиялық жағдайға байланысты және Ведомствоаралық комиссияның 2020 жылдың 8 қазанындағы хаттамасына сәйкес жарыстарды өткізуге қойылатын барлық санитарлық-эпидемиологиялық талаптар қатаң сақталуға міндетті. Мәселен, споршылар, жаттықтырушылар, төрешілер мен команда басшылары жарысқа тек COVID-19-ға теріс шыққан ПЦР-сынама құжаттары болған жағдайда ғана қатыстырылады. Аталған талаптың тек Қызылорда облысының командасына қатысы жоқ, - деді өз сөзінде Байтақ Әбілханұлы.

Дегенмен, аталмыш жарысқа кем дегенде үш шетелдік азамат келеді деп күтулуде. Олар – жарысқа қатысушылардың өнерін бағалауға арнайы шақыртылған Ресей Федерациясының белгілі спорт төрешілері.