Алғысым шексіз

Колледжді бітіріп қолға диплом алар кезде бір сәт артқа бұрылып, өткенге көз жібереді екенсің. Егер уақыт сағаты кейін айналып, сол баяғы балауса бірінші курстан бастап қайта оқыр болсам, еш ойланбастан, ештеңені өзгертпестен дәл осы жолды қайта таңдар едім. Дәл осылай қайта оқушы болар едім, дәл сол тәтті шақтарды басымнан қайта өткізер едім. Егер де бүкіл өмірімді кітап етіп жазар болсам, колледж қабырғасындағы үш жылым үш том кітап болары анық. Әр күні, әр сәті қайталанбас бақытты үш жыл үш күндей өте шыққанына әлі сене алар емеспін...
Мен «Тігін өндірісі және киімдерді үлгілеу» мамандығы бойынша білім алдым. Бізге білім мен тәрбие берген колледжімнің ұстаздарына шын жүректен алғыс айтамын. Осы оқу орнында білім алғанымыма шексіз қуаныштымын.
Қуаныш та, мұңайған сәттер де болды. Әрбір іс-шарасына рақмет айтамын, себебі басқа оқу топтарымен бірігіп ұйымдастырып, кейде бәсекелесіп, бірде жеңіс тұғырынан көрінсек, келесіде курстастарымыздың жетістіктеріне марқайдық. Қызықты күндерді өткіздік. Ұстаздарымыздың берген білімдерінің арқасында ақыл-ойымыз толысып, біліміміз кемелденіп, білмегенімізді ұқтық.
Тігін өнеріне баулыған ұстаздарымыз Мақтагүл Орымбаева, Манат Бекетова мен Жанар Барақбаеваға алғысым шексіз.

Жадыра ТАЛҒАТ,
Т-18-9 оқу тобын бітіруші

500