Көңіл айтамыз!

Сыр өңірінің білім саласы орны толмас ауыр қазаға ұшырады. 74 жасында көрнекті ғалым, ҚР білім беру ісінің Құрметті қызметкері, филология ғылымдары бойынша философия докторы (PhD), Ресей жаратылыстану Академиясының профессоры, Қызылорда Болашақ университетінің құрылтайшысы Зейнегүл Досманбетова дүниеден озды.

З.Досманбетова 1947 жылы 27 наурызда Қызылорда қаласында дүниеге келген. 1972 жылы Н.В.Гоголь атындағы Қызылорда педагогикалық институтына оқуын бітірген.

Еңбек жолын 1969 жылы Қармақшы ауданындағы №105 қазақ орта мектебінде орыс тілі мен әдебиеті пәнінің мұғалімі болып бастап, кейінгі жылдары директордың тәрбие, оқу ісі жөніндегі орынбасары қызметтерінде болған.

2003 жылдан бүгінгі күнге дейін Болашақ университетінің Білім беру және ғылыми-зерттеу жұмыстары орталығының директоры қызметін абыроймен атқарып, аймақта білікті мамандар даярлау ісіне өлшеусіз үлес қосты.

Зейнегүл Рамазанқызы Сыр өңірінің белгілі мемлекет және қоғам қайраткері Бақберген Сәрсенұлы Досманбетовпен тұрмыс құрып, ғылым, білім, руханият жолында бірге қанат сермеді. Төрт ұл өсірді. Кез келген салада өзінің жаны сүйген іспен айналысу үшін өмірлік серігінің қолдау, ықыласының орны бөлек. Бұл тұрғыдағы жарасымды түсіністіктің орнағандығы олардың ұлт руханияты, білімі мен мәдениетін өркендетуге қосқан үлесінен танылғандай.

Зейнегүл Рамазанқызы Досманбетованың жарқын бейнесі, оның ағартушылық жолындағы атқарған еңбегі қызылордалықтардың есінде мәңгілік сақталады.

Текей батыр Қарпықұлы атындағы жоғары колледж ұжымы

637