Қоғамымыздағы ең қауіпті мамандықтардың бірі – өрт сөндіруші маман қызметі. Күн сайын табиғи апат салдарынан туындайтын немесе қауіпсіздік ережелерін дұрыс сақтамау салдарынан туындайтын өрттермен бетпе-бет келіп, тілсіз жаудың «тілін табуға» тырысатын маман иелерінің қызметі шын мәнінде оңай емес. Кез келген сәтте тілсіз жау өзіңе тап беріп немесе жалынға оранған заттың үстіңе құлап кетуі, иіс тиіп, ес жоғалтуың әбден мүмкін. Сондықтан төтенше жағдайларда ең алдымен көмекке ұмтылып, тұрғындарды қауіпсіз жерге көшіруге тырысатын өрт сөндіруші мамандардың еңбегі ерлікпен пара-пар!

Әсіресе аптап ыстық күндері өрт оқиғалары жиілей түседі. Сондықтан өрт сөндіру қызметінсіз қоғамымызды елестете алмаймыз. Шыны керек, аяқ асты өрт тұтана қалған жағдайда кез-келген адам сол жерді тастай қашуға, үрейге берілуге даяр тұрады. Ал төтенше жағдайлардағы өрт сөндіру мамандары сондай сәтте керсінше жалынның ортасына жүгіре жөнеледі. Бұл оның қызметі ғана емес, міндеті. Өрт сөндірушілер әр минут сайын өз өмірлерін тәуекелге байлап, өзіне қауіп төндіреді. Кез келген уақытта қыстың қақаған суығы мен жаздың аптап ыстығына қарамастан отқа да, суға да түседі. Осылайша, жүктелген жауапкершілікті арқалаған жандар үшін құтқару, көмектесу деген мақсат күн сайын бірінші орында тұрады. Төтенше жағдай кезінде өзінен бұрын өзгенің өмірін құтқаруға ұмтылады. Сондықтан олардың қызметі әлемдегі ең ауыр, күрделі мамандықтардың бірінен саналады. Лауазымдарының өрт сөндіруші-құтқарушы болып өзгеруі де тегін емес. Өртті сөндіріп қана қоймай, басқа адамдардың арашасы болып ұмтылатындары үшін құтқарушы қызметін де мамандықтарына атау ретінде тіркеді. 

Бүгін Текей батыр Қарпықұлы атындағы жоғары колледжінің оқу ғимаратында «өрт өтіндегі өмірдің» нақ иелері, дәлірек айтқанда, Қызылорда облысы ТЖД «Өрт сөндіру және авариялық құтқару жұмыстары қызметі» мемлекеттік мекемесінің 2022 жылға арналған «Өрт-тактикалық жаттығулары мен өрт-тактикалық сабақтарының кестесіне»  сәйкес өрт-тактикалық жаттығуы өткізілді. 

Жаттығу 20-25 минутқа созылып, ғимаратта төтенше жағдай бола қалғанда жүруі тиіс жедел іс-әрекеттер пысықталды. Қарапайым тілмен айтқанда, іштегі қызметкерлер дабыл бойынша қауіпсіз жерге шығарылды,  өрт шарпуы кезінде ғимараттан шыға алмай қалған зардап шегушілер де құтқарылып, алғашқы медициналық көмек те көрсетіліп жатты,  «тілсіз жау»  да ауыздықталды.

Ең бастысы, жаттығу барысын бүгінгі колледж оқушылары, ертеңгі төтенше жағдайларда құтқарушы – Тж-21-9 оқу тобының студенттері тамашалап тұрды. Бүгінгі шара – оларға қосымша мотивация болғандығы анық.