06 қыркүйек 2022 ж, 16:12
ҚАЗАҚ ТІЛІ - МӘРТЕБЕМ
Осыдан 33 жыл бұрын — 1989 жылы 22 қыркүйек күні «Тіл туралы» заң қабылданған болатын. Бұл заңда Қазақ ССР-нің мемлекеттік тілі қазақ тілі, ал орыс тілі — ұлтаралық тіл деп бекітілген еді. 1998 жылдың 20 қаңтарынан бастап 22 қыркүйекте атап өтілетін мереке, 2017 жылғы үкімет басшысы Бақытжан Сағынтаев «Қазақстан Республикасында мереке күндер тізбесін бекіту туралы» қаулысымен 5 қыркүйекке ауыстырылған. Атаулы датаның өзгеру себебі — «Ұлттың сақталуына да, жоғалуына да себеп болатын нәрсенің қуаттысы — тіл» деген ұлағатты сөз қалдырған, қазақ халқының тағдыры мен тілі үшін күрескен Алаш арысы, ұлт ұстазы Ахмет Байтұрсынұлының туған күнімен байланысты. Бұл күні барша қазақстандық қазақ әліпбиінің негізін салған ғалымның туған күнінде Тілдер мерекесін тойлайды.
6 қыркүйек күні Текей батыр Қарпықұлы атындағы жоғары колледжінің «Мәжіліс залында» Жастар комитетінің жетекшісі Назерке ЖАҚСЫҒҰЛОВАНЫҢ ұйымдастыруымен 5 қыркүйек — Қазақстан халқының тілдері мерекесіне аналған «Қазақ тілі — мәртебем» атты кездесу өтті. Ұлт ұстазы, қазақ әліпбиінің негізін қалаушы ғалым Ахмет Байтұрсынұлының 150 жылдық мерекесін қоса қамтыған шараға Қызылорда қалалық «Қазақ тілі» қоғамының төрағасы, колледжіміздің оқытушысы, ардагер ұстаз Бағдат МӘМБЕТОВ және жастар белсендісі, «Кітап құрттары» атты кітап оқырмандары клубының негізін қалаушы Талғат МЕҢДІБАЕВ қатысты.
Шара барысында өнерпаз білім алушылар өз өнерлерін көрсетіп, шараға қатысушылардың ықыластарына бөленді. Атап айтқанда, 2-курс студенті Томирис КӨПЖАСАР «Туған жер» әнін шырқаса, биыл ғана колледж табалдырығын аттаған Байдәулет ДОСТИЯР Дина Нұрпейісованың «Келіншек» күйін келістіре орындады. Сондай-ақ, Жолдас АМАНЖОЛОВ, Думан ЖОЛМАН және Айдана СӘДУАҚАС белгілі ақындардың тіл туралы өлеңдерін мәнерлеп оқыды.
207
