Жұмысқа – ұлттық киімде: Наурыз мерекесіне орай колледж қызметкерлері челлендж ұйымдастырды

Бүгіннен бастап Текей батыр Қарпықұлы атындағы жоғары колледжінің оқытушылары мен студенттері классикалық киім үлгісін ұлттық нақыштағы киім-кешекке ауыстырды.
Челленджді бастаған педагогтар осылайша қазақтың ою-өрнегі бар қамзол-қапетті бір апта бойы кимек.

«Біз өзіміз ғана киіп қоймай, басқа оқу орнындағы әріптестерімізді де челленджді қолдауға шақырамыз. Себебі, қазақтың ұлттық киімін күнделікті өмірде қолдану, жаңа өң беру – құндылықтарды сақтаудың ең нәтижелі жолы. Ою-өрнекке көмілген киімдердің түр-түрін күнделікті қолданысқа енгізіп, трендке айналдыру өзімізден басталады»,- дейді оқытушы Жұлдызай Арғынбаева.

Естеріңізге сала кетейік, пандемияға байланысты биыл да Наурыз мейрамында халық көп шоғырланатын ойын-сауықтықтарға тыйым салынған. Сондықтан оқу орнында мерекелік іс-шаралар негізінен онлайн ұйымдастырылатын болады.